Internet-Gestur

Uss hvað tíminn líður hratt! Hjörtur að verða fjögurra ára og bjórvissuferðin er á morgun. Ég er búinn að setja inn nýja könnun. Ég var að lesa Fréttablaðið í morgun og rak þar augun í að Freddy Krueger hefur verið valinn mesta illmenni sögunnar. Ekki marktækt val þar sem ég var ekki hafður með í ráðum en það verður heldur betur ráðin bót á því núna. Hjálpið til við að móta söguna og nýtið ykkar atkvæði vel.

Þessi gaur er ekki með þeim heppnari í bransanum. Hann reyndar lítur út eins og Michael Jackson þannig að kannski á hann framtíðina fyrir sér og ég þarf að éta hattinn minn. Hver veit?

Er að verða búinn. Hér sit ég í strætó um daginn og hugsa: “Þetta er merkilegt. Það er vetur og mér er ekki kalt á tánum (mér er nefninlega alveg ofboðslega kalt á tánum á veturna). Það á nú eftir að rætast úr því, janúar og febrúar eru eftir með sín -4° skemmtilegheit.” En nei, janúar er að verða búinn!!!!! Það er bara febrúar eftir með sínar hugsanlegu -4°sem eru ekki líklegar miðað við veturinn sem er að verða búinn. Það er búið að vera stórkostlegt veður í vetur og við hér í birtingardeild Internet-Gests fögnum því gríðarlega og sendum út fagnaðarkveðjur til fátæku barnanna í Breiðholti með tilheyrandi pompi og prakt.
En að öðru. Eins og fram kom í fyrri skrifum þá tók Einar sig til og snaraði í eitt stk sælkeraklúbbinn Jónas. Hann fær einstakar kveðjur fyrir framlag sitt til heimsins. Hann fær samt örugglega ekki kveðjur frá Hirti. Þannig liggur nefninlega í málinu að Einari datt í hug að elda mexíkanska súpu með kjúklingi og hektara af chili pipar. Þar sem að Hjörtur getur ekki lagt sér til munns neinn sterkari mat en vatnsglas þá var að sjálfsögðu fjandinn laus. Ég sjálfur fékk reyndar snert af heilablæðingu við að borða þessa súpu þar sem hún var sirka 400° á fahrenheit og gæti hæglega séð Hveragerði fyrir orku í 18 ár. Við komum að Hirti á þvottaherbergisgólfinu, þar sem hann lá í fósturstellingunni, söng Erykah Badu og ranghvolfdi í sér augunum. Einar sótti þá dýrara smyrslið sitt og fór með ljóð á meðan hann hlúði að Hirti eins og vængbrotnum fugli. Hjartnæm stund, verð ég að segja.
Svo er maður sem fær verðlaun vikunnar. Um daginn var stormur. Lögreglan var búin að biðja fólk um að vera heima hjá sér vegna hættu við að fjúka til Garðabæjar og það vill enginn. Ég og Rósa vísuðum þessari bón Lögreglunnar til föðurhúsanna og fórum í bíó. Sáum Sherlock Holmes sem var ágætis skemmtun og fær meðmæli undirritaðs. Á leiðinni heim úr bíóinu var skyggni 0 metrar, grenjandi rigning og svínslegt rok. Allt í einu öskrar Rósa eins og hún hafi vaknað á Breiðabliks leik og ég hamraði á bremsuna hraðar en Chuck Norris hugsar. Þá er einhver bölvaður asni að HJÓLA á móti umferð í þessu ansvítans veðri og var þá staddur svona meter fyrir framan bílinn með aumasta blikkljós sem ég hef séð til að vekja á sér athygli.
Þessi maður fær klárlega verðlaun fyrir að vera maður vikunnar og þau eru ekki af verri endanum, þáttaka á þingflokksfundi Borgarahreyfingarinnar! Til hamingju, hjólandi maður!
Segi þetta gott í bili, er að hugsa nýja könnun, ef það er eitthvert brennandi málefni þá smellið því í komment!

Já, maður er ekki af baki dottinn þó svo að ekki hafi komið inn ný færsla síðan Hjörtur fæddist eða í nokkra mánuði. A-gjemli hefur verið upptekinn við að skila inn heljarverkefnum á stærð við Grímseyjarferju og er rétt að detta niður í súrefni núna eftir ruddalega jólatörn. Það sem mér finnst hafa gerst markvert á árinu(markvert þýðir ekki gott endilega):
Hinn nýji íslenski Aríabanki.
Einar Haralds var edrú fram yfir frímínútur.
Ég eignaðist litla frænku (Big like).
Alþingismönnum tókst að verða þroskaheftari með hverri mínútunni.
Einari Ben var hleypt til UK.
Andri Stussy er ennþá lifandi(já, bæði lifur og hjarta starfa “eðlilega”).
Henry Erni Magnússyni hefur ekki enn verið hneppt í gæsluvarðhald vegna meintra dólgsláta. “Tilbúningur” segir lögfræðingur hans.

Nú er kjeppinn að fara að skrifa ritgerð. 65 bls af visku verður skilað fyrir vorið og ef allt gengur eftir þá verð ég viðskiptafræðingur með vinnu í Bónus í sumar. Það verður gaman að lifa þá!

En i kvöld er það Jónas. Jónas er sælkeraklúbbur sem Einar Haralds var rekinn úr sælla minninga. Hann tók upp á því í fyrradag að blása til stórveislu og er honum hér með boðið til starfa aftur sem starfsmaður á plani. Vonum að hann töfri eitthvað glæsilegt fram því menn eru hungraðir!

Núna fer ég að koma mér í skrifgírinn aftur og handan við hornið er nýr maður líðandi stundar, Andrasaga og sitthvað brakandi.

Þangað til þá, arriverderci!

Þó svo að yfirleitt skrifi ég um hluti sem skipta engu máli og leikskólabörn hrista hausinn yfir, þá verð ég að pósta þessum eðalmanni hérna. Þetta er svo rétt hjá honum. Sérstaklega finnst mér þetta eiga við um Ísland:

Var haldið á dögunum í Brekkutúninu við dynjandi lófatak. Þeir sem voru mættir til að taka þátt voru: Gestur, Einar, Hjörtur og Árni Jón Birgisson.
Gríðarleg spenna var í mótinu alveg þangað til Einar gerði því að hann fékk 70 stig í fyrstu umferð og þá sáu hinir keppendur sæng sína útbreidda. Einar var númer tvö í röðinni. Restin af þessu móti var svo ekkert spennandi EN boðað verður til móts nr 2 á næstunni sem verður byrjunin á leiðinni til EM í Scrabble. Svo fylgist vel með!

Ef við snúum okkur nú að léttara hjali, þá er það helst að frétta að Mærudagar eru afstaðnir þar sem Einari tókst að hneyksla bæjarbúa enn og aftur (vaknaði læstur inni í bíl, ber að ofan, með gat á hausnum og tequila flösku í fanginu) og er alls óvíst að okkur verði hleypt í bæinn að ári.

Það sem mér þykir þó hafa helst staðið uppúr í sumar er dagurinn sem ég varð óléttur. Nú leggja örugglega margir við hlustir því það er ekki á hverjum degi sem karlmaður verður óléttur (nema í Kína) og þá ekki heldur heljarmenni á borð við mig. Ég er eins og allir vita óopinber fyrirliði Íslands í karlmennsku og varð því vægast sagt hvumsa þegar þetta bar allt saman að garði.

Svo er nú mál að vexti að ég var í fríi í sumarbústaði á Hofsósi. Ég vaknaði þegar mér sýndist svo(karlmennska), fór upp og fékk mér kaffi á fastandi maga(karlmennska). Svo rýndi ég útum gluggann og velti fyrir mér veðrinu og hvort “hann” myndi snúa í norðanátt(fáránlega mikil karlmennska). Eftir þessa venjulegu karlmennskurútínu mína settist ég niður og graðgaði í mig mat(karlmennska). En, svo hætti það bara ekkert!!

Ég sat bara allan daginn að snæðingi. Ég sporðrenndi hverri samlokunni á fætur annarri, drakk kaffi og djús, borðaði ávexti, pizzu, pasta, núðlur og fleira og fleira. Á sama tíma hreyfði ég mig ekki neitt heldur át á mig gat bara. Þannig leiddi ég það út án þess að hlusta á Rósu(karlmennska) að ég væri óléttur(ekki nein rosaleg karlmennska).

Sem betur fer leið þetta tímabil hjá en ég þarf að taka heldur betur á því í ræktinni næstu daga og kalla mig feitabollu.

Í gær var svo síðasti dagur í vinnu. Ég er búinn að fara í rómantískt bað með Polar bjór 4,7% og best of CCR í botni til að þvo burt Byko rykið og saurugar hugsanir. Próf í næstu viku og Oddi fram að því. Líkami minn fyllist unaðstilfinningum þegar ég hugsa um Odda og olíuna sem er seld sem kaffi þar. Dásamlegt!

Svo get ég ekki beðið eftir 2010. 2009 bauð uppá efnahagskreppu, flett ofan af viðbjóðslegu viðskiptaferli allra fyrirtækja á Íslandi og síðast en ekki síst Svínaflensu. Hvaða góðgæti skyldi nú leynast handan við 31. desember??

Þar sem ég sit og hlusta á eitt svakalegasta lag allra tíma (Lagið verður á listanum) finn ég mig knúinn til að skvera í eitt stykki topp tíu lagalista. Listi þessi verður órjúfanlegur hér með og ef einhver er ósammála mér þá verður sá að eiga það við sína samvisku. Ég hef ákveðið að það verði eingungis eitt lag per hljómsveit því annars væri líklegt að Ljótu Hálfvitarnir myndu fylla þennan lista. Listinn er ekki endilega í réttri röð en þó má draga ályktun á gæðum laganna þar sem ég ætla að romsa þeim uppúr mér á staðnum að ekki verði ólíklegt að bestu lögin komi fyrst. Þar sem komin er tími á nýja könnun þá er ekki úr vegi að þið sjálf kjósið um bestasta lagið á listanum. Áður en ég smelli listanum inn þá ætla ég að hrósa Einari Ben fyrir frábært komment um daginn. Það kom svona til: Einn maður sagði: “Ástin spyr ekki um aldur.” Einar Ben : “Nei, en Kompás gerir það!”

1. One – Metallica
2. Fans – Kings of Leon
3. Romeo and Juliet – Dire Straits
4. Here I go again -Whitesnake
5. Fear of the dark – Iron Maiden
6. Letting the cables sleep – Bush
7. La Grange – ZZ Top
8. Lookin´ out my back door – Creedence Clearwater
9. Carry on Wayward son – Kansas
10. Dream on – Aerosmith

Skellið ykkar áliti í komments en ekki búast við jákvæðum viðbrögðum!