Internet-Gestur

Jæja, þá er komið að fjórðu sögunni í seríunni um Andra Stussy og ævintýri kappans. Að þessi sinni var hann staddur á Akureyri og fékk mikla aðstoð frá Ásgeiri.

Þannig var að þeir félagar sóttu Norðurland heim og ákváðu að fá sér aðeins í glas. Til að gera langa sögu stutta þá voru þeir á heimleið til Tryggva sem býr rétt fyrir utan Akureyri og fundu það út að best væri að taka hjól sem lá á vergangi og hjóla á því til Tryggva.

Ekki létu þeir staðar numið þar heldur komu við á einhverjum polli á Akureyri sem mér skilst að sé kallaður Pollurinn. Þar gerði Andri sér lítið fyrir, stökk inn að pollinum og stal gæs álíka hratt og Brynjar klárar 1l Pepsi og 1 pakka af fjólubláum Tröllatópas. Gæsina setti hann inná sig og gerði sig líklegan til að halda áfram að hjóla. Ási ætlaði nú ekki að vera minni maður og gerði heiðarlega tilraun til að nappa svani. Hann varð þó að láta í minni pokann þar sem svanurinn var ca 2 metrum hærri en hann og hvæsti og var með dólg.

Þannig að þeir félagar hjóluðu niður Gilið á Akureyri, sem er brattasta brekka sem ég hef séð á ævinni, Ási að stýra og Andri sat og steig pedalanna með gæsina góðu innan á peysunni. Ekki vildi betur til en svo að þeir brotlentu neðarlega í brekkunni ógurlegu, rúlluðu nokkra hringi og eyðilögðu hjólið góða. Hafa ber í huga að gæsin var ennþá innan á Andra.

Nú voru góð ráð dýr. Hjólið ónýtt og leigubílapeningarnir höfðu klárast á barnum. Þeir töltu áleiðis af stað og vonuðust til að geta komist á puttanum. Þeim varð að ósk sinni þegar mikill öðlingur stöðvaði og bauð þeim far. Andri settist aftur í, feginn að vera loksins á leiðinni heim.

Eftir smákeyrslu þá verður bílstjórinn var við hljóð og undarlega hreyfingu í aftursætinu og spyr Andra: “Ertu með eitthvað innnan á þér eða?” Andri svarar neitandi að sjálfsögðu og reynir að laga og hemja gæsina hvað hann getur og nær að hrista athygli bílstjórans af sér. Sem betur fer er ekki löng keyrsla og þeir komast út á áfangastað “heilu og höldnu”.

Daginn eftir kemur mamma hans Tryggva inn í herbergið hans til að vekja drengina og bjóða þá velkomna í dýrindis morgunmat sem hún hafði græjað fyrir þá. Þegar hún lítur inn sér hún þrjá áfengisdauða drengi (Tryggvi hafði farið fyrr heim kvöldið áður) og eina gæs sem var búin að skíta út allt herbergið og hljóp út frelsinu fegin. Það er skemmst frá því að segja að drengirnir fengu ekki notalega vakningu þann morguninn.