Internet-Gestur

Hóhóhó! Jólasveinninn er kominn snemma í ár! Eins og allir vita þá eru kosningar á morgun og því vel við hæfi að snara inn eins og einni Andra sögu.

Eitt sinn voru Kópavogsmenn á góðu tjútti í bænum eins og svo oft áður. Andri var þar fremstur meðal jafningja og Ásgeir (a.k.a Sexkanturinn, a.k.a Smáskyr, a.k.a Ríkisstarfsmaðurinn) fylgdi honum fast á eftir. Eftir margra klukkustunda gaman fannst þeim félögum þó tímabært að halda heim enda skjóðan farin að segja til sín. Óþarft þykir að taka fram að Andra finnst ekki leiðinlegt að borða.

Þeir félagar skeggræddu hvað skyldi snæða fyrir svefn og Andri hafnaði Nonnabita á þeim forsendum að mútta hans ætti fullan frysti af humri. Í ofanálag væri hún í sumarbústað og þeir gætu því farið heim til hans, eldað humarinn og horft á bíómynd meðan góðgætinu væri graðkað í sig.

Ási samþykkti þessa hugmynd fagnandi og iðaði í skinninu eftir að komast í humarveislu a la Andri.

Þegar heim til Andra var komið snaraði Andri fram humrinum, stórri pönnu og hvítlaukssmjöri. Skellti hráefninu á pönnuna og steikti vel.
Þeir félagar settust svo fyrir framan imbann og byrjuðu snæðinginn.
Bragðið var eftir því sem mér best skilst ágætt en undir tönn var þetta ekkert spes. Grjóthart og nánast óætt var veislufangið og enduðu þeir á því að skilja megnið eftir og sofnuðu værum svefni útfrá imbanum.

Daginn eftir kom mamma hans Andra og spurði hvort hann hefði eitthvað verið að vilja í humarinn í frystinum um helgina. “Jáhh!” svaraði Andri og gagnrýndi humarinn eins og rauðvínið í sögu # 1. “Þetta var alveg óætt!” sagði hann sármóðgaður og svekktur yfir annars vel heppnuðu ráni.

Móðir hans tjáði honum þá það að áður en hún hefði farið í bústað hefði hún tekið humarinn í sundur og sett hann í poka og skeljarnar í annan til poka til að sjóða og gera úr humarsúpu. Michelin kokkurinn Andri hafði þá tekið pokann með skeljunum og steikt þær uppúr hvítlaukssmjöri og þeir félagar grandalausir hakkað þær í sig!

Við óskum Andra enn og aftur til hamingju með veisluna og bendum fólki á að gefa honum Veislurétti Hagkaupa í afmælisgjöf.